"Formula-1" üzrə Azərbaycan Qran-prisində ikinci gün başlayır.

Yenisirvanli.info.az  xəbər verir ki, bu gün Bakıda üç sessiyanın keçirilməsi nəzərdə tutulub.

Əvvəlcə saat 12:00-da "Formula-1" kateqoriyasında sonuncu sərbəst yürüş baş tutacaq. Daha sonra saat 14:15-də "Formula-2" kateqoriyasında sprint (qısa) yarış və sonda, saat 16:00-da "Formula-1" kateqoriyasında sıralanma turu başlayacaq.

Xatırladaq ki, "Formula-1" üzrə Azərbaycan Qran-prisi dünən başlayıb və sabah, sentyabrın 21-də əsas yarışla başa çatacaq.

Qeyd edək ki, Azərbaycan 2016-cı ildən dünyanın ən nüfuzlu avtoidman yarışına ev sahibliyi edir. Ölkəmizdə təşkil olunan ilk "Formula-1" yarışı Avropa Qran-prisi adlandırılıb. Həmin yarışda almaniyalı Niko Rosberq birinci olub. Növbəti illərdə müvafiq olaraq Daniel Rikkardo (Avstraliya), Lyuis Hemilton (Böyük Britaniya), Valtteri Bottas (Finlandiya), Serxio Peres (iki dəfə, Meksika), Maks Ferstappen (Niderland) və Oskar Piastri (Avstraliya) bütün rəqiblərini qabaqlayaraq podiumun ən yüksək pilləsinə qalxıblar. Yalnız 2020-ci ildə Azərbaycan Qran-prisi koronavirus pandemiyası səbəbindən keçirilməyib.