Ərzaqları düzgün saxlamaq həm onların daha uzun müddət təzə qalmasına, həm də evdə qida israfının azalmasına kömək edir.

Yenisirvanli.İnfo.Az bildirir ki, paxlalılardan pendirə, ədviyyatlardan yumurtaya qədər hər məhsulun özünəməxsus saxlama qaydası var.

Quru ərzaqlar

Quru paxlalıları şüşə qablarda, sərin və quru yerdə saxlamaq məsləhətdir.

Ağ şəkər ağzı möhkəm bağlanan şüşə qabda uzun müddət, düyü isə uyğun şəraitdə təxminən iki ilə qədər saxlanıla bilər.

Kartofu isə soyuducuya qoymaq düzgün deyil. Onu sərin və quru yerdə saxlamaq daha uyğundur.

Pendiri necə saxlamaq lazımdır?

Pendirin daha uzun müddət təzə qalması üçün onu açıq formada soyuducuda saxlamaq əvəzinə yağlı kağıza və folqaya bükmək olar.

Ağ pendiri zeytun yağında saxlamaq da onun istifadə müddətini uzada bilər.

Sərt pendirlər isə düzgün büküldükdə soyuducuda bir neçə həftə qala bilər.

Krem pendiri isə açıldıqdan sonra daha qısa müddətdə, təxminən 10–12 gün ərzində istifadə etmək məsləhətdir.

Ədviyyatları harada saxlamaq lazımdır?

Ədviyyat qablarını sobanın və ya plitənin yanında saxlamaq düzgün deyil. İstilik onların rənginə, qoxusuna və dadına təsir edə bilər.

Ədviyyatları qapalı qabda, sərin, quru və qaranlıq yerdə saxlamaq daha yaxşıdır.

Çay da eyni qaydada, ağzı möhkəm bağlanan qabda və günəş görməyən sərin yerdə saxlanmalıdır.

Çörək və keks

Kekin saxlandığı qaba bir dilim alma qoymaq onun daha uzun müddət yumşaq qalmasına kömək edə bilər.

Çörəyi isə saxladığınız qabın və ya torbanın içinə kiçik bir parça kərəviz qoymaqla daha uzun müddət təzə saxlamaq mümkündür.

Çörəyi parçaya bükərək saxlamaq da onun qurumasının qarşısını almağa kömək edir.

Konservlər

Açılmamış konservlər quru yerdə və otaq temperaturunda saxlanmalıdır.

Onları həddindən artıq isti və ya çox soyuq yerlərdə saxlamaq olmaz. Temperaturun kəskin dəyişməsi məhsulun dadına və keyfiyyətinə təsir edə bilər.

Yumurtalar

Yumurtaları soyuducuda öz qablaşdırmasında saxlamaq məsləhətdir. Bu, həm qoxuların yumurtaya keçməsinin qarşısını alır, həm də daha uzun müddət təzə qalmasına kömək edir.

Yumurta sarısını qapalı qabda bir qədər duru yağ əlavə etməklə soyuducuda bir neçə gün saxlamaq olar.

Yumurta ağı da qapalı qabda bir neçə gün saxlanıla bilər.

Qabığı soyulmamış qaynadılmış yumurta isə soyuducuda təxminən bir həftə saxlanıla bilər.

Ərzaqları dondurucuda saxlayarkən

Elektrik kəsilərsə, dondurucunun qapısını mümkün qədər açmamaq lazımdır. Dondurucunun doluluğundan asılı olaraq ərzaqlar müəyyən müddət donmuş vəziyyətdə qala bilər.

Dondurulacaq məhsulları uyğun plastik paketlərə və ya streçə bükmək, üzərinə isə dondurulduğu tarixi yazmaq faydalıdır.

Məhsulları dondurucuda tarix sırasına görə yerləşdirmək də onların vaxtında istifadə olunmasına kömək edir.

Qoz-fındıq kimi məhsullar da yaxşı bağlanmış paketlərdə dondurucuda aylarla saxlanıla bilər.

Tərəvəzləri dondurmazdan əvvəl

Bəzi tərəvəzləri dondurmazdan əvvəl qısa müddət qaynar suda pörtmək onların keyfiyyətini daha yaxşı qorumağa kömək edir.

Kələm – təxminən 1,5 dəqiqə

Kök – 3–5 dəqiqə

Gül kələmi, kərəviz və bibər – 3 dəqiqə

Qarğıdalı – 4–8 dəqiqə

Badımcan – 4 dəqiqə

Yaşıl lobya – 2–3 dəqiqə

Soğan və ispanaq – 2 dəqiqə

Noxud – 2–3 dəqiqə

Balqabaq – 1 dəqiqə

Pörtülmüş tərəvəzləri dərhal buzlu suya salmaq, sonra isə yaxşıca qurudub dondurucuya yerləşdirmək lazımdır.

Yenisirvanli.İnfo.Az