Çinin Sincan Uyğur Muxtar Rayonunda yerli müsəlmanların dini və mədəni irsinə qarşı təzyiqlər davam edir. Araşdırmalara görə, regiondakı məscidlərin ümumi sayının təxminən 65 faizi - 16 minə yaxın ibadət evi ya tamamilə sökülüb, ya da ciddi zədələnib.

Yenisirvanli.İnfo.Az bildirir ki, bu barədə Avstraliya Strateji Siyasət İnstitutunun (ASPI) peyk görüntülərinə əsaslanan təhlilində bildirilir.

Məlumata görə, regiondakı məscidlərin yarıya yaxını bünövrəsindən sökülüb, qalanlarının isə minarələri, günbəzləri və İslam memarlığına aid tarixi elementləri məqsədli şəkildə ləğv edilib.

Mövzunu diqqətdə saxlayan "Financial Times" nəşri də peyk təsvirlərini təhlil edərək diqqətçəkən nəticələr əldə edib. Nəşrin hesabatına görə, tədqiq edilən 2 312 məscidin təxminən 75 faizi 2018-ci ildən bəri ya xarici görünüşcə tamamilə dəyişdirilib, ya da yerlə-yeksan edilib.

"Human Rights Watch" (HRW) beynəlxalq hüquq-müdafiə təşkilatı bəyan edir ki, Sincanda uyğurların dini və mədəni hüquqlarına qarşı təzyiqlər dövlət səviyyəsində daha da intensivləşib.

Hazırda Sincanla yanaşı, müsəlmanların məskunlaşdığı digər əyalətlərdə də oxşar hallarla bağlı araşdırmalar aparılır. Yaxın vaxtlarda yeni statistikanın təqdim olunacağı gözlənilir.

Çin hakimiyyəti isə məscidlərin sökülməsi və ya dəyişdirilməsi ilə bağlı iddiaları qətiyyətlə təkzib edir. Pekin rəsmiləri ölkədə dini etiqad azadlığının qanunla qorunduğunu və həyata keçirilən tədbirlərin yalnız obyektlərin modernləşdirilməsi məqsədi taşıdığını iddia edir.

Yenisirvanli.İnfo.Az