Yenisirvanli.İnfo.Az bildirir ki, Daily Mail qəzetinin məlumatına görə, yeni tədris ilinin başlaması ilə İngiltərənin Midlend və şimal bölgələrində yerləşən bir sıra orta məktəblərdə qız şagirdlərin ətək və don geyinməsinə icazə verilməyib.

Nəşrin yazdığına görə, tədris ili başlamazdan əvvəl təxminən 22 min şagirdin valideyninə məktəbə “gender baxımından neytral” forma ilə gəlməli olduqları barədə xəbərdarlıq edilib. Yeni qaydalara əsasən, qız şagirdlər ətək əvəzinə sadə qara klassik şalvar geyinməlidirlər.

Qəzetin məlumatına görə, bəzi valideynlər qızlarının məktəbdən evə “göz yaşları içində” və ciddi şəkildə məyus qayıtdıqlarından şikayət ediblər. Valideynlərin sözlərinə görə, müəllimlər bəzi şagirdlərdən ətəklərini çıxarıb şalvar geyinmələrini tələb ediblər.

Cons soyadlı analardan biri 11 yaşlı qızı Millinin də bu qayda ilə üzləşdiyini bildirib. Onun sözlərinə görə, qızına məktəb əməkdaşlarının verdiyi şalvarı geyinənədək dərsdə iştirak etməyə icazə verilməyib.

“Bu, ‘vouk’ gündəliyinin həddindən artıq irəli getməsinə nümunədir. Bu, sadəcə gülüncdür və mən hələ də bunun məntiqinin nədən ibarət olduğunu başa düşmürəm. O, qızdır, özünü qız kimi tanıyır, qız olaraq doğulub və həmişə qız olub. Buna görə də ətək geyinmək hüququ olmalıdır. Onların yeni siyasəti baxımından bunu başa düşürəm, amma bununla razı deyiləm. Məncə, bu, seksist yanaşmadır və bərabərsizliklə bağlı suallar doğurur”, — deyə Cons bildirib.

Digər bir qız şagirdin anası isə məktəbli formasındakı problemə görə qızının təhsil almaq imkanından məhrum edilə bilməsindən narahatlığını ifadə edib.

Qəzetin yazdığına görə, yeni qaydanı dəstəkləyənlər qız şagirdlərin şalvar geyinməsinin daha praktik olduğunu və bunun valideynlərin məktəbli forması ilə bağlı xərclərini azaltmağa imkan verdiyini bildirirlər.

Təşəbbüsün tərəfdarları həmçinin ətəklərin həddindən artıq qısa olması ilə əlaqədar qızların təhlükəsizliyi ilə bağlı narahatlıqların aradan qalxacağını düşünürlər. Bununla belə, yeni qayda bəzi valideynlər tərəfindən qızların geyim seçiminə məhdudiyyət qoyulması və təhsil hüququ ilə bağlı mübahisələrə səbəb olub.

Yenisirvanli.İnfo.Az