Konqo Demokratik Respublikasında (KDR) mayın 15-dən elan edilən Ebola epidemiyası zamanı yoluxanların sayı 8 978-ə çatıb.

Yenisirvanli.İnfo.Az xəbər verir ki, ölkənin 7 əyalətindəki 65 zonaya yayılan epidemiya nəticəsində təsdiqlənmiş ölüm sayı 4 336-ya yüksəlib.

Epidemiyadan sağalanların sayı 2 356 nəfər təşkil edir. 

Virusun ölüm göstəricisi 48,3 faiz, infeksiyalaşmış şəxslərlə təmasda olanların müəyyən edilməsi nisbəti isə 81 faizdir.

Son 24 saat ərzində - Tşopo əyalətindəki bir həkim də daxil olmaqla - 18 nəfər sağalıb. 

Ötən sutka ərzində Bas-Uele, Cənubi Kivu və Cənubi Ubangi əyalətlərində yeni yoluxma halı qeydə alınmayıb.

Hemorragik qızdırmaya səbəb olan Ebola virusu ilk dəfə 1976-cı ildə Nzara (Sudan) və Yambuku (KDR) şəhərlərində eyni vaxtda baş verən yoluxma halları ilə ortaya çıxıb. Xəstəlik adını KDR-dəki epidemiyanın ilk dəfə alovlandığı kəndin yaxınlığından axan Ebola çayından götürüb.

Xatırladaq ki, Ebola virusu 2013-cü ilin dekabrında Qərbi Afrikada da geniş yayılmışdı. Qvineya, Liberiya və Syerra-Leonedə 2014–2017-ci illərdə tüğyan edən epidemiya zamanı 30 min insan virusa yoluxmuş, 11 mindən çox şəxs həyatını itirmişdi.

Ölkədə yenidən epidemiya elan edilməsinə KDR-in şərqindəki İturi əyalətində 246 şübhəli yoluxma və 65 ölüm halının qeydə alınması səbəb olub.

Səhiyyə rəsmilərinin məlumatına görə, may ayında aşkar edilən "Bundibugyo" Ebola variantı üçün təsdiqlənmiş xüsusi müalicə üsulu və ya peyvənd hələ ki mövcud deyil.

Yenisirvanli.İnfo.Az