Qazaxıstanın ölkəmizdə yeni təyin edilən hərbi attaşesi polkovnik Salauat Xayruşev bu gün Azərbaycanın müdafiə naziri general-polkovnik Zakir Həsənova təqdim olunub. 

“Yenisirvanli.info.az” xəbər verir ki, bununla bağlı Müdafiə Nazirliyi (MN) məlumat yayıb.

Müdafiə naziri qazaxıstanlı qonağı ölkəmizdə fəaliyyətə başlaması münasibətilə təbrik edib. Azərbaycan-Qazaxıstan münasibətlərinin dostluq və qardaşlıq prinsiplərinə, zəngin tarixi ənənəyə söykəndiyini qeyd edən nazir hərbi attaşeyə ölkələrimiz arasında hərbi əməkdaşlığın genişləndirilməsi istiqamətində gələcək xidmətində uğurlar arzulayıb. 

Polkovnik S.Xayruşev göstərilən etimada görə təşəkkürünü bildirib və fəaliyyəti dövründə hərbi əlaqələrin daha da möhkəmləndirilməsi üçün səylərini əsirgəməyəcəyini qeyd edib.

Görüşdə hərbi, hərbi-texniki, hərbi-təhsil və digər sahələrdə əməkdaşlığın cari vəziyyəti müzakirə edilib, yeni perspektivləri, eləcə də qarşılıqlı maraq doğuran bir sıra digər məsələlərlə bağlı fikir mübadiləsi aparılıb.