Yorğunluq və bu ağrı hansı xəstəliyə işarədir?

Yorğunluq, ağrı və göyərmələr bəzən ciddi sağlamlıq problemlərinin əlaməti ola bilər. Bu şikayətlər çox vaxt diqqətə alınmadan ötəri keçir, amma bəzən onlar bədənimizdə ciddi bir problemin olduğunu göstərir.

Yenisirvanli.İnfo.Az xəbər verir ki, hər üç simptom bir arada və ya tək-tək meydana gələrək müxtəlif xəstəliklərin xəbərçisi ola bilər.

Yorğunluq ən çox diqqət edilməyən şikayətlərdən biridir. Həmçinin, gün ərzində davam edən yorğunluq bədənin düzgün işləmədiyinin, yaxud enerji səviyyələrinin aşağı düşməsinin göstəricisi ola bilər. Çox təkrarlanan yorğunluq, yuxu pozğunluğu, depressiya, anemiya, şəkərli diabet, hipotiroidizm və ürək xəstəlikləri kimi problemlərdən qaynaqlana bilər. Bədənimizdəki ağrılar da müxtəlif səbəblərə bağlı ola bilər. Əzələ ağrıları, yüngül idman zədələri və ya uzun müddət oturmaqdan qaynaqlana bilər. Lakin, davamlı və güclü ağrılar, xüsusilə baş, bel, sinə və ya qarın bölgəsində hiss edilən ağrılar, ürək xəstəlikləri, böyrək problemləri, onurğa xəstəlikləri və hətta onkoloji xəstəliklərin göstəricisi ola bilər. Ağrıların qısa müddətdə keçməməsi və şiddətlənməsi mütəxəssis həkimə müraciət etməyi tələb edir. Bədəninizdə birdən-birə meydana gələn göyərmələr bəzən ciddi bir sağlamlıq problemindən xəbər verir.

Əgər heç bir xarici travma (zədə) olmadan dərinizdə göyərmələr yaranırsa, qan laxtalanması və qan dövranı problemləri baş verə bilər. Bununla yanaşı, vitamin və mineralların çatışmazlığı (xüsusilə C vitamini), qanaxma pozğunluqları, bəzi dərmanların istifadəsi və hətta ciddi xəstəliklər, o cümlədən leykemiya və ya hemofiliya da bədənimizdə göyərmələrə səbəb ola bilər.

Bu kimi hallarda nə etməliyik?

Bir müddət istirahət edin. Yorğunluq, ağrı və göyərmələr şikayətləri ciddi bir narahatlıq yaratdığı zaman bu əlamətləri mütləq mütəxəssis həkimlə müzakirə etmək lazımdır. Belə şikayətlərin arxasında duran xəstəliklərin erkən mərhələdə aşkarlanması müalicə prosesini asanlaşdıracaq və sağlamlığın qorunmasına kömək edəcəkdir.

Unutmayın ki, sağlam bədən və ruh üçün hər hansı bir dəyişiklik hiss etdiyiniz zaman həkimə müraciət etmək vacibdir. (Milli.az)

 Yenisirvanli.İnfo.Az