Prezident İlham Əliyevin fərmanı ilə “Azərenerji” ASC yenidən təşkil ediləcək.

Yenisirvanli.İnfo.Az xəbər verir ki, Tribuna.Az-ın əldə etdiyi məlumata görə, qurumun yenidən formalaşdırılması hazırkı ASC prezidenti Balababa Rzayevin səlahiyyətlərinin bölüşdürülməsi və əlindən alınması ilə nəticələnəcək. Belə ki, ilk növbədə prezidentin fərmanı ilə İdarə Heyəti yaradılır. Yəni ASC sədri vəzifəsi əhəmiyyətini itirir. Əvəzində İdarə Heyətinə sədr seçiləcək. Üstəlik, ümumi yığıncağın səlahiyyətlərinin həyata keçirilməsi dövlət başçısına, Nazirlər Kabinetinə və İqtisadiyyat Nazirliyinə həvalə olunub. Yəni Balababa Rzayev deyil, prezident, NK və İN qurumda səlahiyyət sahibləri olacaqlar. Eyni zamanda, Prezident Cəmiyyətin yenidən təşkili və ləğvi, icra orqanının yaradılması, İH sədrinin və onun müavinlərinin vəzifəyə təyin və vəzifədən azad edilməsi və digər səlahiyyətlərə malik olacaq. Sadə dillə desək, B. Rzayevin təyinatlarda və digər qərarlarda heç bir səlahiyyəti olmayacaq. Bu da onun portfelsiz məmura çevrilməsi kimi qiymətləndirilə bilər. Və ümumiyyətlə, təkcə onun deyil, “Azərenerji”nin yenidən təşkili ilə idarəetmə forması dəyişəcək. Yəni qarşıda prezident tərəfindən İdarə Heyətinə sədr və sədr müavinləri təyin olunacaq. Həmin vəzifəli şəxslərin kim olacağını söyləmək çətindir və dövlət başçısının səlahiyyətində olan bir məsələdir. Onun kimləri seçəcəyini müəyyənləşdirmək mümkün olmasa da, Baba Rzayevin İdarə Heyətinin sədri təyin olunmayacağı, son fərmandan irəli gələrək postu ilə vidalaşacağı istisna edilmir. Mövzunu diqqətdə saxlayacağıq.

Yenisirvanli.İnfo.Az