ABŞ Dövlət katibi Marko Rubio Ermənistanın Baş naziri Nikol Paşinyanı rəhbərlik etdiyi “Vətəndaş müqaviləsi” partiyasının parlament seçkilərindəki qələbəsi münasibətilə təbrik edib. 

“Yenisirvanli.info.az” xəbər verir ki, bu barədə ABŞ Dövlət Departamentinin bəyanatında deyilir. 

ABŞ Dövlət katibi İrəvanın “sülh gündəliyinə” dəstəyini ifadə edib.

Marko Rubio ölkəsinin “Beynəlxalq Sülh və Rifah naminə Tramp Marşrutu” (TRIPP) layihəsinin icrası da daxil olmaqla, Vaşinqton sülh sammitində müəyyən edilmiş hədəflər istiqamətində irəliləməyə sadiq olduğunu qeyd edib. 

Onun sözlərinə görə, ABŞ Cənubi Qafqazda və bu regionun hüdudlarından kənarda sülhün, sabitliyin və firavanlığın təmin edilməsi üçün Ermənistan hakimiyyəti ilə birgə işi davam etdirməyə ümid edir.

Xatırladaq ki, iyunun 7-də Ermənistanda parlament seçkiləri keçirilib. Deputat mandatları uğrunda 2 blok və 16 siyasi partiya mübarizə aparıb. İlkin nəticələrə görə, ölkənin hazırkı Baş naziri Nikol Paşinyanın “Vətəndaş müqaviləsi” partiyası 49,81% səslə qalib gəlib.