ABŞ Prezidenti Donald Tramp Hərbi Dəniz Qüvvələrinə Hörmüz boğazında mina düzən istənilən İran qayığını dərhal məhv etmək əmri verdiyini açıqlayıb.

“Yenisirvanli.info.az” xəbər verir ki, Tramp bu barədə özünün “Truth Social” platformasında paylaşım edib.

O, paylaşımında İranın rəsmi hərbi donanmasının artıq mövcud olmadığını iddia edərək, hədəfdə kiçik sürətli qayıqların olduğunu vurğulayıb:

“Amerika Birləşmiş Ştatlarının Hərbi Dəniz Qüvvələrinə Hörmüz boğazının sularına mina düzən hər hansı bir qayığı (hətta kiçik qayığı) vurmaq və öldürmək əmrini verdim. (Onların bütün hərbi gəmiləri – sayca 159-u da dənizin dibindədir!) Heç bir tərəddüd olmamalıdır! Əlavə olaraq, bizim “mina süpürənlərimiz” hazırda boğazı təmizləyirlər. Mən bu fəaliyyətin üçqat sürətlə davam etdirilməsini əmr edirəm”.

Qeyd edək ki, sözügedən bəyanat ABŞ hərbçilərinin Hind okeanında İrana məxsus növbəti neft tankerini ələ keçirməsindən və İranın Hörmüz boğazında iki ticarət gəmisinə nəzarəti ələ almasından dərhal sonra yayılıb. Pentaqonun hesablamalarına görə, boğazın minalardan tam təmizlənməsi təxminən 6 ay çəkə bilər ki, bu da dünya neft ticarətinə ciddi zərbə deməkdir.